ខ្លួនមនុស្សយើងក៏ដូចគ្នា ប្រៀបដូចជា ជើងពាន ឬក៏ធុងសម្រាមដូច្នោះដែរ ព្រោះខ្លួនមនុស្សយើងជាកន្លែងសម្រាប់ដាក់របស់ល្អ និងរបស់មិនស្អាតដូចគ្នា។ របស់ល្អ បានដល់ សភាវៈល្អគឺ បុណ្យ មាន ទាន សីល ភាវនា រហូតដល់កុសលថ្នាក់សតិប្បដ្ឋាន ឬកុសលថ្នាក់អរិយមគ្គ។ របស់មិនស្អាត បានដល់ សភាវៈមិនល្អគឺ បាបអកុសល សំដៅដល់ការប្រព្រឹត្តកន្លងនូវសីល ការប្រព្រឹត្តកន្លងកម្មបថ ឬបានដល់ កិលេសទាំងបីថ្នាក់ មាន វិតក្កមកិលេស ១ បរិយុដ្ឋានកិលេស ១ និង អនុស័យកិលេស១។
ចូរជ្រើសរើសដោយខ្លួនឯង តើយើងគួរធ្វើខ្លួនឱ្យដូចជាជើងពាន ឬជាធុងសម្រាម? ធម្មតាជើងពានជារបស់មានតម្លៃ ជនទាំងឡាយតែងតែប្រាថ្នា ដូចមនុស្សយើងដែរ មានអ្នកដទៃគប់រក ទៅណាមកណាសម្បូរអ្នករាប់អាន មិនខ្វះញាតិ ជាមនុស្សមានតម្លៃ ផ្ទុយមកវិញ ធុងសម្រាមជាវត្ថុដែលគ្មានតម្លៃ គ្មានអ្នកណាចង់បាន ព្រោះផ្ទុកតែរបស់មិនស្អាត អាក្រក់ស្អុយរលួយជាដើម ដូចមនុស្សយើងដែរ ដែលប្រព្រឹត្តមិនល្អ ខុសធម៌ខុសវិន័យ ទៅទីណាក៏គ្មានអ្នកដទៃចង់រាប់អាន គេខ្លាចរអា ខ្លាចឆ្លងធាតុអាក្រក់មកដល់ខ្លួនគេ ដូចធុងសម្រាម គេយកទៅដាក់ឆ្ងាយពីខ្លួន ព្រោះខ្លាចឆ្លងរោគ៕
No comments:
Post a Comment